VERÖLD SEM VAR. Gamla myndin. Það er nú svolítið síðan að þessi mynd var tekin en mikið er gaman að rýna í hana. Það er Guðbjartur Walter H. Ólafsson sem birtir hana á Facebook. Þarna má sjá Húsgagnahöllina og háhýsi Íslenskra aðalverktaka. Prentsmiðjan Oddi er þar fyrir neðan. Fremst á myndinni til hægri er húnsæði Osta- og smjörsölunnar. Engin er byggðin í Grafarvogi og að sjálfsögðu engin Gullinbrú en hafist var handa við gerð hennar eftir kosningarnar 1982 þegar Davíð Oddsson vann kosningasigur meðal annars út á að byggja meðfram ströndinni og reisa nýtt 20 þúsund manna hverfi í Reykjavík, Grafarvog. Sjálfur giska ég á að myndin sé tekin í kringum 1973.

Það voru Væb-bræður sem sigruðu í söngvakeppni Sjónvarpsins í Gufunesi í gærkvöldi. Yfir 2 þúsund manns lögðu leið sína í Gufunesið til að horfa á keppnina. Eftir keppnina myndaðist veruleg umferðarteppa þar sem fjöldi lögreglumanna setti upp ölvunarpóst við gatnamót Gufunesvegar og Strandvegar, að sögn Arnórs Valdimarssonar íbúa í Grafarvogi sem skrifar um málið á FB-síðu Íbúa í Grafarvogi. Og hann er ekki sáttur: „Að öllu jöfnu þá fagna ég sýnileika @Lögreglan á höfuðborgarsvæðinu í hverfinu okkar! Þar sem hún hefur ekki fasta viðveru þar lengur (því miður). En sem yfirvald þá er traust og meðalhóf sanngjörn krafa íbúa og annara vegfarenda um hverfið okkar. Eftir frábært kvöld á frábærri Söngvakeppni Sjónvarpsins í Gufunesi í kvöld, þá kom ekkert annað en valdníðsla og truflun á eðlilegri umferð í hugann (í anda meirihlutans) þegar ég varð vitni að vinnubrögðum Lögreglu á gatnamótum Gufunesvegar og Strandvegar. Þar var Lögreglan mætt með fjölda bíla og urmul af fólki. Og stöðvaði hvern einasta bíl á gatnamótunum, hvers afleiðing var að einungis örfáir bílar fóru yfir á hverjum grænum ljósum! Þetta eru gatnamót sem meirihluti Reykjavíkur hefur hundsað að bæta flæði á, þrátt fyrir ítrekaðar óskir íbúa og (eins og Lögreglunni er fullkunnugt um) endalausar tafir! Það að stöðva hvern einasta bíl á ljósunum er alls ekkert meðalhóf og skapaði óþarfa umferðaröngþveiti og langar tafir eftir samkomu hátt í 2 þúsund manns! Maður spyr sig, er það ekki hlutverk Lögreglu að hindra brot? Væri ekki nær að athuga ástand ökumanna í Gufunesi frekar en að búa til KAOS á verstu gatnamótum hverfisins? Eins og kollegar þeirra gera jafnan eftir góðar þjóðhátíðir?“

Nýtt hlutverk. Gamli gæsluvöllurinn í Hamrahverfinu, nefndur Kidduróló í daglegu tali, hefur fengið nýtt og göfugt hlutverk; það er verið að breyta honum í nýjan leikskóla með tveimur deildum. Ekki veitir sjálfsagt af í þeim leikskólavandræðum sem ríkir í Reykjavík. Gæsluvöllurinn hefur ekki verið notaður sem slíkur til margra ára. Grafarvogur.net myndaði framkvæmdirnar í morgun. Árni Guðmundsson skrifar um málið á FB-síðu Íbúa í Grafarvogi og bendir á að Reykjavíkurborg hafi ekki birt neina grenndarkynningu á breyttu hlutverki húsnæðisins og stækkuninn - sem er umtalsverð. Hér kemur innslagið frá honum: „Sæl öll. Þar sem búið er að leggja Íbúaráð Grafarvogs niður (ásamt öllum íbúaráðum borgarinnar, en það var fyrsta verk nýs meirihluta) deili ég hér máli sem var á dagskrá næsta fundar þar sem upplýsinga var óskað um nýbyggingu sem borgin er að byggja við hús á lóðinni Hlaðhömrum 52, sem áður var gæsluvöllur (Kidduróló). Húsið sem er þar fyrir er um það bil 150 fermetrar á stórri lóð. Eftir ábendingar frá nágrönnum fór ég og skoðaði framkvæmdirnar sem eru langt komnar, en verið er að byggja yfir 300 fermetra viðbyggingu við húsið. Engin grenndarkynning á þessari stækkun hefur farið fram og Íbúaráðið fékk ekki tilkynningu eða upplýsingar um þetta. En eftir fyrirspurn í vetur kom fram að verið væri að endurbæta húsnæðið! Samkvæmt þeim upplýsingum sem ég hef aflað mér stendur til að opna leikskóla þarna með tveim deildum. Að sjálfsögðu eiga svona framkvæmdir að fara í kynningarferli, allavega verðum við fasteignaeigendur að fara eftir slíkum reglum.“

Tónaflóð í Grafarvogi . Það verður líf og fjör í kvöld þegar úrslitakvöld Söngvakeppninnar 2025 fer fram í kvikmyndaveri RVK Studios í Gufnesi og verður í beinni á RÚV klukkan 19:45. Sex lög keppa til úrslita. Á vef RÚV segir að Herra Hnetusmjör opni úrslitakvöldið og þá munu Käärjaa og Hera Björk stíga á svið. Kynnarnir þrír verða sem fyrr: Guðrún Dís Emilsdóttir, Benedikt Valsson og Fannar Sveinsson . Meðfylgjandi mynd af þeim er fengin af vef RÚV og merkt Ragnari Visage. Lögin sem keppa til úrslita eru: 1. Like You – Ágúst. 2. Aðeins lengur – Bjarni Arason. 3. Fire – Júlí og Dísa. 4. RÓA – VÆB. 5. Words – Tinna. 6. Set Me Free – Stebbi Jak. Kosningafyrirkomulagið er með breyttu sniði í ár. Það verður ein símakosning sem mun vega helming á móti atkvæðum alþjóðlegrar dómnefndar. Síðustu ár hefur einvígi milli tveggja efstu laga ráðið úrslitum. Käärijä treður upp Úrslitakvöldið verður viðburðaríkt og boðið verður upp á ýmis skemmtiatriði auk laganna sex sem keppa. Finnski Eurovision söngvarinn Käärijä, sem lenti í 2. sæti í Eurovision 2023 með lagið Cha Cha Cha, kemur fram ásamt sænsku sveitinni Hooja. Herra Hnetusmjör mun opna kvöldið með vinsælasta laginu á Íslandi í dag og Hera Björk, sigurvegari Söngvakeppninnar í fyrra, syngur á sviðinu áður en hún afhendir verðlaunagripinn til sigurvegara kvöldsins. Úrslit Söngvakeppninnar hefst í beinni útsendingu á RÚV í kvöld klukkan 19:45 og munu þá Gunnar Birgisson og Edda Sif Pálsdóttir fara yfir stemninguna fyrir keppnina með góðum gestum. Í lok kvöldsins verður ljóst hver verður fulltrúi Íslands í Eurovision í Basel í maí. Höfundar þriggja laga hafa ákveðið að flytja lag sitt á ensku, tvö verða áfram flutt á íslensku og eitt á bæði íslensku og ensku. ALÞJÓÐLEGA DÓMNEFNDIN ÞANNIG SKIPUÐ Sietse Bakker, yfirframleiðandi Eurovision 2021 - Holland Niamh Kavanagh, söngkona og sigurvegari Eurovision 1993 - Írland Ersin Parlak, tónlistarumboðsmaður og fjölmiðlafulltrúi í Eurovision - Tyrkland Saba, söngkona í Eurovision 2024 - Danmörk Peter Fenner, Eurovision-sérfræðingur - England Maria Sur, söngkona í Melodifestivalen 2024 - Úkraína Damir Kedžo, Eurovision-söngvari – Króatía

Gylfi Dalmann Aðalsteinsson , prófessor við viðskiptadeild Háskóla Íslands, náði fyrir jól frábærri mynd af Friðarsúlunni í Viðey. Hann var að vitja leiða í Gufuneskirkjugarði þegar þetta einstaka sjónarhorn blasti við honum; Friðarsúlan böðuð í norðurljósunum. Gylfi skrifar með myndinni: „Hér hvílast þeir, sem þreyttir göngu luku...orti Steinn Steinarr.“ Friðarsúlan er útilistaverk eftir Yoko Ono og var reist árið 2007. Ljós súlunnar tendra himininn jafnan frá 9. október, sem var fæðingardagur Johns Lennon, til 8. desember sem var dánardagur hans. Þess má geta að Gylfi hefur sérhæft sig í vinnumarkaðsfræðum og telst einn helsti sérfræðingur þjóðarinnar á því sviði. Hann var knattspyrnumaður í KR á yngri árum og formaður félagsins um árabil.