Páskarnir minna á sig í Bónus: Páskaungarnir brosa út í annað

Guli liturinn er auðvitað litur páskanna með sínum gulu páskaungum, liljum, kertum, sérvéttum og öðru páskaskrauti. Þótt enn séu fimm vikur til páska þá eru páskarnir farnir að minna á sig í Bónus í Spönginni þótt guli liturinn sé auðvitað viðvarandi í vörumerki Bónuss. Þar eru komnar stórar stæður af páskaeggjum frá helstu súkkulaðiframleiðendum landsins en litlu páskaeggin mátti fyrst sjá í versluninni fyrir einhverjum vikum. Við erum súkkulaðiþjóð – og stolt af því; stæðurnar munu tæmast og bætt verður á þegar nær líður hátíðinni.