Hluthafaspjallið: Hvar liggur ávinningurinn af sameiningu Arion og Íslandsbanka?
20. febrúar 2025
Viðskipti. Fréttir og klippur úr hlaðvarpinu Hluthafaspjallinu
á Brotkast.is í umsjón ritstjóranna og gömlu brýnanna, Jóns G. Haukssonar og Sigurðar Más Jónssonar, munu fljóta reglulega með fréttum hér á Grafarvogur.net. Þetta er vikulegt hlaðvarp okkar félaganna um það helsta sem er að gerast í Kauphöllinni og viðskiptalífinu, en við Sigurður kynntumst fyrst í blaðamennsku fyrir um 38 árum þegar við unnum saman.
Í nýjasta hlaðvarpinu, sem tekið var upp í gærdag, ræðum við meðal annars um tilboð Arion banka gagnvart stjórn Íslandsbanka um sameiningu bankanna. Við fórum yfir það að þetta yrði stærsti bankinn – núna verðmetinn á um 500 milljarða – og yrði eitt af stóru félögunum í Kauphöllinni. En vonandi skráir ríkið Landsbankann á markað við tækifæri þó líklegegt verði að norska leiðin yrði farin og að ríkið ætti ætíð ráðandi hlut í bankanum – en það er önnur ella.
Ávinningurinn af sameiningu Arion banka og Íslandsbanka
fæst fyrst og fremst með tvennu móti: Fækkun starfsmanna og lægri fjármögnunarkostnaði bankans; þ.e. betri kjörum í skuldabréfaútboðum og fjármögnun erlendis. En auðvitað sparast líka eitthvað í húsnæði og rekstri tölvukerfa.
Þetta er framboðshliðin – hagkvæmni stórrekstrar. En eftirspurnarhliðin er kannski alveg eins viss með þessa sameiningu og laust við að viðskiptavinir bankanna óttist að fákeppnin verði of mikil með tveimur stórum bönkum í stað þriggja.
Við birtum hér glæru um stöðu bankanna fjögurra á íslenska fjármálamarkaðnum.
Sameinaður banki Arion-Íslandsbanki yrði um 500 milljarða virði. Ávinningurinn
- svonefnd samlegðaráhrif af sameiningunni - yrði með fækkun starfsmanna
en ekki síst lægri fjármögnunarkostnaði bankans. Auðvitað einhver sparnaður líka
af minna húsnæði og rekstri tölvukerfa. Það tekur Samkeppniseftirlitið líklega
um tvö ár að komast að slíkri risasameiningu. Margir telja ólíklegt að Samkeppniseftirlitið
leyfi þessa sameiningu.
