„Herra Fjölnir“ kominn heim: Gunnar Már tekur við meistaraflokki Fjölnis
17. febrúar 2025
Fjölnismenn
voru ekki lengi þjálfarlausir í meistaraflokki karla eftir að félagið rifti frekar óvænt samningi við Úlf Arnar Jökulsson. „Herra Fjölnir“ eins og hann er stundum nefndur, Gunnar Már Guðmundsson, hefur tekið við liðinu.
Í tilkynningu frá Knattspyrnudeild Fjölnis segir að Gunnar Má þurfi vart að kynna fyrir Fjölnisfólki. „Hann er næst leikjahæsti leikmaður í sögu félagsins og hefur spilað með Fjölni í öllum deildum landsins.
Hann var þjálfari meistaraflokks kvenna 2016–2017, aðstoðarþjálfari meistaraflokks karla 2018–2020 og yfirþjálfari yngri flokka. Síðastliðið ár þjálfaði hann Þrótt Vogum með góðum árangri.
Það er sérstaklega ánægjulegt að tilkynna heimkomu „Herra Fjölnis“ nú þegar félagið fagnar 37 ára afmæli sínu.
Velkominn heim Gunni!“
