14 íbúðum troðið niður við ein erfiðustu gatnamót Grafarvogs
20. mars 2025
Þetta eru ein erfiðustu gatnamótin í Grafarvogi.
En hér á að troða niður 14 íbúðum; einbýli, raðhúsum og parhúsum. Við erum að tala um gatnamótin við Rimaflöt, Gufunesveg og Gullinbrú; gegnt Gullnesti og bensínstöð Orkunnar.
Hér stendur til að strauja allt niður og byggja á þessum litla fleti - og þrengja þannig að gatnamótunum með nýjum íbúðum í stað þess að losa um þessi gatnamót og finna lausnir til að liðka til fyrir umferðinni.
Það er gert er ráð fyrir 20 þúsund nýjum íbúðum í landi Blikastaða (Mosfellsbæ), Keldna og Ártúnshöfða - og ekki má gleyma Geldinganesi og stækkun Bryggjuhverfis. Það mun reyna mjög á allt vegakerfi í Grafarvogi og aðra innviði á næstu árum og áratugum.
Nei, nei, þá er ákveðið að þrengja að einum erfiðustu gatnamótunum í Grafarvogi með frekari byggð í stað þess að hugsa í lausnum og liðka til fyrir stóraukinni umferð bíla sem og hjólandi og gangandi vegfarenda á næstu árum.
Síðastliðið haust var þrengt að gatnamótunum með því að setja upp strætóskýli án þess að gera útskot. Þarna hefði frekar átt að setja þægilega hægri beygju inn á Rimaflötina til að liðka til fyrir umferðinni.
Fjórtán nýjum íbúðum troðið niður á þetta svæði alveg niður að Rimaflötinni. Hinn guli reiturinn, til hægri, eru væntanleg fjölbýlishús við Sóleyjarrima, alveg ofan í gömlu Gufunesstöðinni; nú Fjárskiptastöð Isavia.
Horft upp að horninu við gatnamótin. Þarna á að troða niður einu einbýlishúsi - að vísu ekki alveg ofan í gatnamótunum en nóg til þess að erfiðara verður að finna lausnir í framtíðinni til að liðka til fyrir mjög svo fyrirsjáanlegri og stóraukinni umferð.
